കൊൽക്കത്തയിലെ വിവേകാനന്ദ യുബ ഭാരതി ക്രീരംഗണിൽ നടന്ന ഫൈനലിൽ ഡയമണ്ട് ഹാർബർ എഫ്‌സിയെ 6-1 എന്ന കൂറ്റൻ മാർജിനിൽ തകർത്ത് നോർത്ത് ഈസ്റ്റ് യുണൈറ്റഡ് എഫ്‌സി കിരീടം വിജയകരമായി നിലനിർത്തിയതോടെ ഡ്യൂറൻഡ് കപ്പ് 2025-ന് ശനിയാഴ്ച സമാപനമായി. 1991-ൽ ഈസ്റ്റ് ബംഗാളിന് ശേഷം ഡ്യൂറൻഡ് കപ്പ് തുടർച്ചയായി നേടുന്ന ആദ്യ ടീം എന്ന ബഹുമതിയും ഹൈലാൻഡേഴ്സ് സ്വന്തമാക്കി. ഇത് പരിശീലകൻ ഹുവാൻ പെഡ്രോ ബെനാലിയുടെ കീഴിലുള്ള ടീമിന്റെ വളർച്ചയ്ക്ക് കൂടുതൽ കരുത്തേകുന്നു.

നോർത്ത് ഈസ്റ്റ് യുണൈറ്റഡ് എഫ്‌സി വീണ്ടും ഡ്യൂറൻഡ് കപ്പിൽ തങ്ങളുടെ മുദ്ര പതിപ്പിച്ചെങ്കിലും, ടൂർണമെന്റിലുടനീളം നിരവധി കളിക്കാർ തങ്ങളുടെ വ്യക്തിഗത മികവുകൊണ്ട് ശ്രദ്ധ പിടിച്ചുപറ്റി.

ഡ്യൂറൻഡ് കപ്പ് 2025-ലെ മികച്ച പ്രകടനം കാഴ്ചവെച്ച താരങ്ങൾ ഇവർ:

അലെയ്ഡിൻ അജ്‌റായി (നോർത്ത് ഈസ്റ്റ് യുണൈറ്റഡ് എഫ്‌സി)

2024-25ലെ ഇന്ത്യൻ സൂപ്പർ ലീഗിലെ (ഐഎസ്എൽ) പ്ലെയർ ഓഫ് ദി സീസൺ ആയിരുന്ന ഈ മൊറോക്കൻ താരം, കഴിഞ്ഞ സീസണിൽ നിർത്തിയിടത്തുനിന്നാണ് ഡ്യൂറൻഡ് കപ്പിലും തുടങ്ങിയത്. ടൂർണമെന്റിൽ എട്ട് ഗോളുകളും നാല് അസിസ്റ്റുകളും സ്വന്തം പേരിൽ കുറിച്ച അജ്‌റായി, തുടർച്ചയായ രണ്ടാം വർഷവും ഹൈലാൻഡേഴ്സിനെ മുന്നിൽ നിന്ന് കിരീടത്തിലേക്ക് നയിച്ചു.

ഗ്രൂപ്പ് ഘട്ടത്തിലെ ഹാട്രിക്കും, ക്വാർട്ടർ ഫൈനലിലെ ഇരട്ടഗോളും, ഫൈനലിലെ ഒരു ഗോളും മൂന്ന് അസിസ്റ്റുകളും അദ്ദേഹത്തിന്റെ ആധിപത്യം ഉറപ്പിച്ചു. ടൂർണമെന്റിൽ നാല് പ്ലെയർ ഓഫ് ദി മാച്ച് അവാർഡുകൾ നേടിയ അദ്ദേഹം, ടൂർണമെന്റിലെ ടോപ് ഗോൾസ്കോറർക്കുള്ള ഗോൾഡൻ ബൂട്ടും മികച്ച കളിക്കാരനുള്ള ഗോൾഡൻ ബോളും സ്വന്തമാക്കി.

ലിസ്റ്റൺ കൊളാസോ (മോഹൻ ബഗാൻ സൂപ്പർ ജയന്റ്)

കൊൽക്കത്ത ഡെർബിയിൽ ചിരവൈരികളായ ഈസ്റ്റ് ബംഗാളിനോട് പരാജയപ്പെട്ട് മോഹൻ ബഗാൻ സൂപ്പർ ജയന്റ് ഡ്യൂറൻഡ് കപ്പിന്റെ ക്വാർട്ടർ ഫൈനലിൽ പുറത്തായെങ്കിലും, ലിസ്റ്റൺ കൊളാസോയ്ക്ക് മികച്ച ടൂർണമെന്റായിരുന്നു ഇത്. അഞ്ച് ഗോളുകൾ അദ്ദേഹം ഈ വർഷത്തെ ടൂർണമെന്റിൽ നേടി.

മറൈനേഴ്സിന്റെ മൂന്ന് ഗ്രൂപ്പ് മത്സരങ്ങളിലും ഈ വിംഗർ ഗോൾ നേടി. മുഹമ്മദൻ എസ്‌സിക്കും ബിഎസ്എഫ് എഫ്ടിക്കുമെതിരെ ഇരട്ട ഗോളുകൾ ഇതിൽ ഉൾപ്പെടുന്നു. ഫൈനലിസ്റ്റുകളായ ഡയമണ്ട് ഹാർബറിനെ 5-1ന് തകർത്ത മത്സരത്തിലും അദ്ദേഹം ഒരു പെനാൽറ്റി ഗോൾ നേടി. ടൂർണമെന്റിൽ മൂന്ന് പ്ലെയർ ഓഫ് ദി മാച്ച് അവാർഡുകളും കൊളാക്കോ നേടിയിട്ടുണ്ട്. കൊളാസോയുടെ ഫോമിലേക്കുള്ള തിരിച്ചുവരവ് മോഹൻ ബഗാന് വലിയ പ്രതീക്ഷയാണ് നൽകുന്നത്.

അൻവർ അലി (ഈസ്റ്റ് ബംഗാൾ എഫ്‌സി)

സെമി ഫൈനലിലെ തോൽവിയിൽ ഈസ്റ്റ് ബംഗാളിന്റെ ജൈത്രയാത്ര അവസാനിച്ചുവെങ്കിലും, ടൂർണമെന്റിൽ അവർക്ക് സന്തോഷിക്കാൻ ഏറെ നിമിഷങ്ങളുണ്ടായിരുന്നു. അവരുടെ ഡ്യൂറൻഡ് കപ്പ് പ്രകടനത്തിലെ പ്രധാന പങ്കുവഹിച്ചത് അൻവർ അലിയായിരുന്നു. അദ്ദേഹത്തിന്റെ നേതൃത്വത്തിലെ ഈസ്റ്റ് ബംഗാളിന്റെ പ്രതിരോധത്തെ തകർക്കാൻ എതിരാളികൾ പലപ്പോഴും ബുദ്ധിമുട്ടി.

ഓസ്കാർ ബ്രൂസോണിന്റെ ടീം ടൂർണമെന്റിൽ രണ്ട് ക്ലീൻ ഷീറ്റുകൾ നിലനിർത്തുകയും അഞ്ച് മത്സരങ്ങളിൽ നിന്ന് വെറും നാല് ഗോളുകൾ മാത്രം വഴങ്ങുകയും ചെയ്തു. ഈ പ്രതിരോധ പ്രകടനത്തിൽ അലി ഒരു വലിയ പങ്ക് വഹിച്ചു. പ്രതിരോധത്തിൽ മാത്രമല്ല, ആക്രമണത്തിലും മികവ് പുലർത്തിയ അൻവർ അലി, ടൂർണമെന്റിൽ രണ്ട് ഗോളുകളും നേടി.

സൈറുഅത് കിമ (ഡയമണ്ട് ഹാർബർ എഫ്‌സി)

ടൂർണമെന്റിലെ കറുത്ത കുതിരകളായിരുന്നു ഡയമണ്ട് ഹാർബർ എഫ്‌സി. ഫൈനൽ വരെ മുന്നേറിയ അവരുടെ പ്രകടനത്തിൽ നിർണായകമായ താരങ്ങളിൽ ഒരാളായിരുന്നു ഡിഫൻഡർ സൈറുഅത് കിമ. 27-കാരനായ താരം മൂന്ന് മത്സരങ്ങളിൽ മാത്രമേ കളിച്ചുള്ളൂവെങ്കിലും അദ്ദേഹത്തിന്റെ സ്വാധീനം വളരെ വലുതായിരുന്നു. ഫൈനലിന് മുമ്പ് അദ്ദേഹം കളിച്ച മൂന്ന് മത്സരങ്ങളിൽ നിന്ന് വെറും രണ്ട് ഗോളുകൾ മാത്രമാണ് ഐ-ലീഗ് 2 ചാമ്പ്യന്മാർ വഴങ്ങിയത്. ജംഷഡ്‌പൂർ എഫ്‌സിക്കെതിരായ ക്വാർട്ടർ ഫൈനൽ വിജയവും ഈസ്റ്റ് ബംഗാളിനെതിരായ സെമി ഫൈനൽ വിജയവും ഇതിൽ ഉൾപ്പെടുന്നു.

പ്രതിരോധ താരമായ അദ്ദേഹം, എതിരാളികളുടെ ബോക്സിലും ഒരു ഭീഷണിയായിരുന്നു. ടൂർണമെന്റിൽ മൂന്ന് ഗോളുകൾ നേടിയ കിമയുടെ റെക്കോർഡിൽ ക്വാർട്ടർ ഫൈനലിൽ ജംഷഡ്‌പൂർ എഫ്‌സിക്കെതിരെ നേടിയ ഇരട്ട ഗോളുകളും ഇതിൽ ഉൾപ്പെടുന്നു. ആ ഗോളുകളാണ് ടീമിന് ജയം നൽകിയത്. ടൂർണമെന്റിൽ രണ്ട് പ്ലെയർ ഓഫ് ദി മാച്ച് അവാർഡുകളും കിമ നേടി.

ലൂക്കാ മാജ്സെൻ (ഡയമണ്ട് ഹാർബർ എഫ്‌സി)

ഡയമണ്ട് ഹാർബറിന്റെ ഫൈനലിലേക്കുള്ള കുതിപ്പിൽ ചാലകമായത് സ്ലോവേനിയൻ ഫോർവേഡ് ലൂക്കാ മജ്സെൻ ആയിരുന്നു. ടൂർണമെന്റിൽ നാല് തവണ ഗോൾ നേടിയ അദ്ദേഹം, എല്ലാ ഗ്രൂപ്പ് മത്സരങ്ങളിലും ഗോളിൽ പങ്കാളിയായി. ഫൈനലിൽ ഗോൾ നേടാനും അദ്ദേഹത്തിനായി.

മുൻ പഞ്ചാബ് എഫ്‌സി സ്ട്രൈക്കറായ അദ്ദേഹം നോക്കൗട്ട് ഘട്ടങ്ങളിൽ ഒരു ഗോൾ മാത്രമേ നേടിയുള്ളൂവെങ്കിലും, ജംഷഡ്‌പൂർ എഫ്‌സി, ഈസ്റ്റ് ബംഗാൾ എഫ്‌സി തുടങ്ങിയ ഐഎസ്എൽ ടീമുകളെ മറികടക്കാൻ ടീമിനെ സഹായിക്കുന്നതിൽ അദ്ദേഹത്തിന്റെ സാന്നിധ്യവും നേതൃത്വവും ഒരു വലിയ ഘടകമായിരുന്നു.