ഈ ലേഖനം ഇംഗ്ലീഷിലും ലഭ്യമാണ്.

എഎഫ്സി ഏഷ്യൻ കപ്പ് യോഗ്യതാ മത്സരങ്ങൾക്കുള്ള ഇന്ത്യൻ സീനിയർ ദേശീയ ടീം ക്യാമ്പിലേക്ക് തിരഞ്ഞെടുക്കപ്പെട്ടതിന്റെ ആവേശത്തിലാണ് പാലക്കാട് ഒറ്റപ്പാലം സ്വദേശിയായമുഹമ്മദ് സുഹൈൽ. ഖത്തറിൽ നടന്ന എഎഫ്സി അണ്ടർ 23 ഏഷ്യൻ കപ്പ് യോഗ്യതാ റൗണ്ടിൽ ഇന്ത്യൻ അണ്ടർ 23 നിരക്കായി നടത്തിയ തകർപ്പൻ പ്രകടനമാണ്പഞ്ചാബ് എഫ്‌സിയുടെ വിങ്ങർക്ക് സീനിയർ ടീമിലേക്കുള്ള വഴിതുറന്നത്.

ഇന്ത്യൻ അണ്ടർ 23 ടീമിനായി കളിച്ച ആദ്യ രണ്ട് മത്സരങ്ങളിലും സുഹൈൽ ഗോൾ നേടിയിരുന്നു. ബഹ്റൈനെതിരെ പ്രതിരോധ താരങ്ങളെ ചടുലനീക്കങ്ങളിലൂടെ മറികടന്ന് ബോക്സിലേക്ക് കുതിച്ച് ഒരു സോളോ ഗോളോടെ തുടങ്ങിയ അദ്ദേഹം, ഖത്തറിനെതിരെ പന്ത് വലയിലേക്ക് ചെത്തിയിട്ട് സ്കോർബോർഡിൽ ഇടം കണ്ടെത്തി. ഖത്തറിനെതിരായ ഈ ഗോൾ ടൂർണമെന്റിൽ ബ്ലൂ കോൾട്ട്‌സിന്റെ പ്രതീക്ഷകൾ നിലനിർത്തിയെങ്കിലും, സന്ദർശകരുടെ ഒരു അവസാന നിമിഷ ഗോളിൽ ഇന്ത്യ 2-1ന് പരാജയപ്പെട്ടു.

Drip, dribble and bang, can’t do anything ‘𝘣𝘰𝘶𝘵 it 🥶🔥#AFCU23 #IndianFootball #BlueColts #MuhammadSuhailpic.twitter.com/nuR2d3aTVW

— Indian Super League (@IndSuperLeague) September 14, 2025

ടീമിന് യോഗ്യത നേടാനായില്ലെങ്കിലും, ടൂർണമെന്റിലെ ഏറ്റവും തിളക്കമുള്ള താരങ്ങളിലൊരാളായിരുന്നു ഈ മലയാളി താരം.

അടുത്തിടെറെവ്‌സ്‌പോർട്‌സിന് (RevSportz) നൽകിയ അഭിമുഖത്തിൽ, ശക്തരായ ഖത്തറിനെതിരെ നേടിയ ഗോളിനെക്കുറിച്ച് സുഹൈൽ ഓർത്തെടുത്തു.

"ഒരു വലിയ മത്സരത്തിൽ ഗോൾ നേടിയിട്ട് ഒരുപാട് കാലമായതിനാൽ എനിക്ക് വളരെ സന്തോഷമുണ്ട്. ഇന്ത്യക്ക് വേണ്ടി കളിക്കുന്നതും ഗോൾ നേടുന്നതും എന്നെ സംബന്ധിച്ചിടത്തോളം വലിയ കാര്യമാണ്," അദ്ദേഹം പറഞ്ഞു.

അവസാനമായി പങ്കെടുത്ത കാഫ നേഷൻസ് കപ്പിൽ ഇന്ത്യൻ സീനിയർ ടീം മികച്ച പ്രകടനം കാഴ്ചവെച്ചിരുന്നു. ഉസ്ബെക്കിസ്ഥാനും ഇറാനും പിന്നിൽ വെങ്കല മെഡൽ നേടിയാണ് ടീം മടങ്ങിയത്. ഇപ്പോൾ, സിംഗപ്പൂരിനെതിരായ ഏഷ്യൻ കപ്പ് യോഗ്യതാ മത്സരങ്ങളിലാണ് ബ്ലൂ ടൈഗേഴ്സിന്റെ ശ്രദ്ധ.

കൂടുതൽ വായിക്കൂ:സിംഗപ്പൂരിനെതിരായ മത്സരത്തിനുള്ള ഇന്ത്യയുടെ സാധ്യത നിര

സുഹൈൽ ഉൾപ്പെടെ അണ്ടർ 23 ടീമിൽ നിന്ന് ഒമ്പത് കളിക്കാരെ ഖാലിദ് ജമീൽ സീനിയർ ടീം ക്യാമ്പിൽ ഉൾപ്പെടുത്തിയിട്ടുണ്ട്. ബെംഗളൂരുവിലെ ക്യാമ്പിൽ ചേരുന്നതിലുള്ള ആവേശം പ്രകടിപ്പിച്ച താരം, സീനിയർ ടീമിന്റെ പടികൾ കയറാനുള്ള ശ്രമത്തിലാണ്.

"സീനിയർ ദേശീയ ടീം ക്യാമ്പിൽ ചേരാൻ അവസരം ലഭിച്ചതിൽ ഞാൻ അങ്ങേയറ്റം ആവേശത്തിലും നന്ദിയുള്ളവനുമാണ്. ഇത് എന്റെ കരിയറിലെ ഒരു വലിയ ചുവടുവെപ്പാണ്. ഓരോ ദിവസവും എന്റെ കഴിവിന്റെ പരമാവധി നൽകാനും കഴിയുന്നത്ര പഠിക്കാനും ഞാൻ ആഗ്രഹിക്കുന്നു," സുഹൈൽ പറഞ്ഞു.

ഒക്ടോബറിലെ നിർണായക മത്സരങ്ങൾക്കായി ദേശീയ ടീമിൽ ഇടംപിടിച്ച പരിചയസമ്പന്നനായ മുന്നേറ്റനിര താരംസുനിൽ ഛേത്രിക്കൊപ്പം കളിക്കാൻ കഴിയുന്നതിന്റെ ആവേശവും 19-കാരനായ സുഹൈൽ പങ്കുവെച്ചു.

"സുനിൽ (ഛേത്രി) ഭായിക്കൊപ്പം ഒരേ കളിക്കളത്തിൽ ഇറങ്ങാൻ കഴിയുന്നത് ഒരു സ്വപ്ന സാക്ഷാത്കാരമാണ്. എന്നെപ്പോലുള്ള ഇന്ത്യയിലെ ഓരോ യുവ ഫുട്ബോൾ കളിക്കാരനും അദ്ദേഹം ഒരു പ്രചോദനമാണ്. അദ്ദേഹത്തിൽ നിന്ന് പഠിക്കാനും ആ അനുഭവസമ്പത്ത് നേടാനും ഞാൻ ആഗ്രഹിക്കുന്നു," അദ്ദേഹം കൂട്ടിച്ചേർത്തു.

കൂടുതൽ വായിക്കൂ:എഎഫ്സി U23 ഏഷ്യൻ കപ്പ് യോഗ്യത ടൂർണമെന്റിൽ തിളങ്ങിയ അഞ്ച് മലയാളികൾ!

കഴിഞ്ഞ അഞ്ച് വർഷമായി സുഹൈൽ പഞ്ചാബ് എഫ്‌സിയുടെ ഭാഗമാണ്. ഈ കാലയളവിലെ തന്റെ വളർച്ചയ്ക്ക് ക്ലബ്ബിനോട് അദ്ദേഹം നന്ദി പറയുന്നു. 2023-24 സീസണിലെ റിലയൻസ് ഫൗണ്ടേഷൻ ഡെവലപ്‌മെന്റ് ലീഗിലെ (RFDL) തകർപ്പൻ പ്രകടനമാണ് അദ്ദേഹത്തിന്റെ കരിയറിലെ വഴിത്തിരിവായത്. അവിടെ ഗോൾഡൻ ബോൾ നേടിയ സുഹൈൽ ഫൈനലിൽ ഈസ്റ്റ് ബംഗാൾ എഫ്‌സിയെ പരാജയപ്പെടുത്തി പഞ്ചാബ് എഫ്‌സിയെ ദേശീയ ചാമ്പ്യൻഷിപ്പ് നേടാൻ സഹായിക്കുകയും ചെയ്തു.

തുടർന്ന് 2024-25 ഇന്ത്യൻ സൂപ്പർ ലീഗ് (ഐഎസ്എൽ) സീസണിൽ അദ്ദേഹത്തിന് സീനിയർ ടീമിലേക്ക് സ്ഥാനക്കയറ്റം ലഭിച്ചു. അവിടെ വളരെ വേഗം അദ്ദേഹം തന്റെ കഴിവ് പ്രകടിപ്പിച്ചു. മൂർച്ചയേറിയ ഉൾക്കാഴ്ച, ബുദ്ധിപരമായ നീക്കങ്ങൾ, പന്തിനൊപ്പം കളിയിൽ സ്വാധീനം ചെലുത്താനുള്ള കഴിവ് എന്നിവയാൽ താരം ഏവരെയും ആകർഷിച്ചു.

"ഞാൻ പഞ്ചാബ് എഫ്‌സിയോട് ഒരുപാട് നന്ദി പറയുന്നു. ഞാൻ അവിടെ എത്തിയിട്ട് ഏകദേശം അഞ്ച് വർഷമായി, എനിക്കത് ഒരു വീട് പോലെയാണ്, ഒരു രണ്ടാമത്തെ വീട് പോലെ. നാല് വർഷം യൂത്ത് ടീമിലും ഒരു വർഷം സീനിയർ ടീമിലും ഞാൻ ചെലവഴിച്ചു. ക്ലബ്ബിലെ എല്ലാവരോടും എനിക്ക് നന്ദി പറയണം; അവർ എന്നെ ഒരുപാട് സഹായിച്ചിട്ടുണ്ട്," സുഹൈൽ പറഞ്ഞു.