ഉറുഗ്വെൻ മധ്യനിര താരം അഡ്രിയാൻ ലൂണയുമായി കരാർ പുതുക്കികേരളാ ബ്ലാസ്റ്റേഴ്‌സ് എഫ്‌സി. 2024 വരെയാണ് കരാർ. 2021-22 സീസണിൽ കേരള ബ്ലാസ്റ്റേഴ്സിനായി മികച്ച പ്രകടനം ലൂണ കാഴ്ചവച്ചിരുന്നു. 2021-22 സീസൺ ഐഎസ്എല്ലിൽ 6 ഗോളുകൾ നേടിയ ലൂണ, 7 ഗോളുകൾക്ക് അസിസ്റ്റും നേടിയിരുന്നു. സീസണിന്റെ ആദ്യാവസാനം ഒരു പോലെ മികച്ചു നിന്ന ലൂണ 2021-22 സീസണിലെ ഹീറോ ഐഎസ്എൽ ടീം ഓഫ് ദി ഇയറിലും ഇടം പിടിച്ചിരുന്നു. ടീമിന്റെ വൈസ് ക്യാപ്റ്റനായിരുന്ന ലൂണ പിന്നീട് ജെസ്സെലിനു പരിക്കേറ്റതോടെ ക്യാപ്റ്റൻ ആകുകയായിരുന്നു!

" മഞ്ഞപ്പടയുടെ ഭാഗമാകാൻ കഴിഞ്ഞതിൽ എനിക്ക് സന്തോഷമുണ്ട്. കെബിഎഫ്സിയുമായുള്ള കരാർ പുതുക്കിയതിൽ ഞാൻ അഭിമാനിക്കുന്നു. കേരളത്തിനൊപ്പമുള്ള എന്റെ ആദ്യ അനുഭവം വളരെ മികച്ചതായിരുന്നു. ക്ലബ്ബിനൊപ്പമുള്ള എന്റെ അടുത്ത രണ്ട് വർഷങ്ങളും വളരെ മികച്ചതായിരിക്കുമെന്ന് ഞാൻ വിശ്വസിക്കുന്നു. ഓരോ കളിയിലും എന്റെ മികച്ച പ്രകടനം കാഴ്ച വെക്കാനും വരും സീസണിൽ ടീമിന് വേണ്ടി മികച്ചത് നേടിയെടുക്കാനും സാധിക്കുമെന്ന് ഞാൻ പ്രതീക്ഷിക്കുന്നു." കരാർ ഒപ്പിട്ടു കൊണ്ട് ലൂണ പറഞ്ഞു.

"ഞങ്ങളുടെ ക്ലബ്ബിൽ ദീർഘകാലത്തേക്ക് അഡ്രിയാൻ കാട്ടുന്ന പ്രതിബദ്ധതയിൽ എനിക്ക് സന്തോഷമുണ്ട്. ലൂണ ഒരു യഥാർഥ നേതാവും പോരാളിയും വലിയ വ്യക്തിത്വവുമാണ്. അദ്ദേഹത്തെപ്പോലെ കൂടുതൽ കളിക്കാർ ഉണ്ടാകാൻ ഞങ്ങൾ ആഗ്രഹിക്കുന്നു.അദ്ദേഹവുമായി കരാർ നീട്ടിയത് ക്ലബ്ബിന്റെ വലിയ നേട്ടമാണ്. ഇതിന് പിന്നിൽ പ്രവർത്തിച്ച എല്ലാവരെയും അഭിനന്ദിക്കാൻ ഞാൻ ആഗ്രഹിക്കുന്നു." കരാർ നീട്ടിയതിലെ ആഹ്ളാദം പങ്കുവച്ചുകൊണ്ട് കേരള ബ്ലാസ്റ്റേഴ്സ് എഫ്സിയുടെ സ്പോർട്ടിംഗ് ഡയറക്ടർ കരോലിസ് സ്കിൻകിസ് പറഞ്ഞു.

അഡ്രിയാൻ ലൂണയുമായി പുതിയ കരാറിൽ ഒപ്പുവെക്കാൻ കഴിഞ്ഞതിൽ എല്ലാവരും വളരെയധികം ആവേശത്തിലാണെന്നാണ് കരാർ കേരളാ ബ്ലാസ്റ്റേഴ്‌സ് മുഖ്യ പരിശീലകനായ ഇവാൻ വുകോമനോവിച്ച് പ്രതികരിച്ചു.

"ഞാൻ പറഞ്ഞതു പോലെ കഴിഞ്ഞ സീസണിൽ ക്ലബ്ബിന്‌ ഏറ്റവും യോജിച്ച കളിക്കാരനായിരുന്നു അഡ്രിയാൻ. ഐഎസ്‌എല്ലിലെ ഏറ്റവും മൂല്യമുള്ള കളിക്കാരിലൊരാളാണ്‌ അദ്ദേഹം. മഹത്തായ വ്യക്തിത്വമുള്ള അദ്ദേഹം ടീമിലേക്ക്‌ ആവശ്യമായ തരത്തിലുള്ള പ്രത്യേകത കൊണ്ടുവരുന്ന കളിക്കാരനാണ്‌. അദ്ദേഹവുമായി കരാർ നീട്ടിയതിൽ ഞങ്ങളെല്ലാവരും ആവേശത്തിലാണ്‌. അടുത്ത സീസണിൽ അദ്ദേഹം കൊച്ചിയിലെത്തുമെന്നതിൽ സന്തോഷമുണ്ട്. ആ മഞ്ഞക്കടലിനു മുന്നിൽ കളിക്കുന്നതിനായുള്ള കാത്തിരിപ്പിലാണ്‌ അദ്ദേഹമെന്നും എനിക്ക് ഉറപ്പുണ്ട്." ഇവാൻ വുകോമനോവിച്ച്‌ പറഞ്ഞു‌.

ലൂണക്കൊപ്പം വിക്ടര്‍ മോംഗില്‍, ജിയാനു അപ്പോസ്തലസ്, ഇവാന്‍ കലിയൂഷ്‌നി എന്നീ വിദേശതാരങ്ങളും ബ്ലാസ്റ്റേഴ്സിനൊപ്പം വരും സീസണിലുണ്ട്.