എഎഫ്സി ഏഷ്യൻ കപ്പ് 2027 യോഗ്യതാ റൗണ്ടിന്റെ ഫൈനൽ ഘട്ടത്തിന് മുന്നോടിയായുള്ള തയ്യാറെടുപ്പിന്റെ ഭാഗമായി, ഇന്ത്യൻ സീനിയർ പുരുഷ ഫുട്ബോൾ ടീം സെൻട്രൽ ഏഷ്യൻ ഫുട്ബോൾ അസോസിയേഷൻ (കാഫ) നേഷൻസ് കപ്പ് 2025-ൽ പങ്കെടുക്കും. ഓഗസ്റ്റ് 29 മുതൽ സെപ്റ്റംബർ 8 വരെയാണ് ടൂർണമെന്റ് നടക്കുക.

ഉസ്ബെക്കിസ്ഥാനും താജിക്കിസ്ഥാനും സംയുക്തമായി ആതിഥേയത്വം വഹിക്കുന്ന ഈ ടൂർണമെന്റിൽ ഇന്ത്യയെ ഗ്രൂപ്പ് ബി-യിലാണ് ഉൾപ്പെടുത്തിയിരിക്കുന്നത്. ദുഷാൻബെയിൽ നടക്കുന്ന ഗ്രൂപ്പ് ഘട്ട മത്സരങ്ങളിൽ ബ്ലൂ ടൈഗേഴ്സ്, ആതിഥേയരായ താജിക്കിസ്ഥാൻ (ഓഗസ്റ്റ് 29), ഇറാൻ (സെപ്റ്റംബർ 1), അഫ്ഗാനിസ്ഥാൻ (സെപ്റ്റംബർ 4) എന്നിവരെ നേരിടും.

ഓരോ ഗ്രൂപ്പിൽ നിന്നും ആദ്യ രണ്ട് സ്ഥാനങ്ങളിൽ എത്തുന്ന ടീമുകൾ പ്ലേ-ഓഫ് ഘട്ടത്തിലേക്ക് മുന്നേറും. സെപ്റ്റംബർ 8-ന് രണ്ട് മത്സരങ്ങളാണ് പ്ലേ-ഓഫിൽ നടക്കുക. രണ്ട് ഗ്രൂപ്പുകളിലെയും രണ്ടാം സ്ഥാനക്കാർ ദുഷാൻബെയിൽ വെച്ച് മൂന്നാം സ്ഥാനത്തിനായി മത്സരിക്കും. ഗ്രൂപ്പ് ജേതാക്കൾ തമ്മിലുള്ള ഫൈനൽ താഷ്കെന്റിലും നടക്കും.

ഗ്രൂപ്പ് എ മത്സരങ്ങൾക്ക് ഉസ്ബെക്കിസ്ഥാനാണ് ആതിഥേയത്വം വഹിക്കുന്നത്. ഉസ്ബെക്കിസ്ഥാനൊപ്പം കിർഗിസ് റിപ്പബ്ലിക്, തുർക്ക്മെനിസ്ഥാൻ, ഒമാൻ എന്നിവരാണ് ഗ്രൂപ്പ് എ-യിലുള്ളത്.

അഫ്ഗാനിസ്ഥാൻ, ഇറാൻ, കിർഗിസ് റിപ്പബ്ലിക്, താജിക്കിസ്ഥാൻ, തുർക്ക്മെനിസ്ഥാൻ, ഉസ്ബെക്കിസ്ഥാൻ എന്നീ ആറ് രാജ്യങ്ങളാണ് കാഫയിലെ അംഗങ്ങൾ. ഇന്ത്യയും ഒമാനുമാണ് ടൂർണമെന്റിന്റെ രണ്ടാം പതിപ്പിലേക്ക് ക്ഷണം ലഭിച്ച ടീമുകൾ. 2023-ലെ ഫൈനലിൽ ഉസ്ബെക്കിസ്ഥാനെ 1-0 ന് പരാജയപ്പെടുത്തിയ ഇറാനാണ് നിലവിലെ ചാമ്പ്യന്മാർ.

കാഫ നേഷൻസ് കപ്പ് 2025 ഗ്രൂപ്പുകൾ

ഗ്രൂപ്പ് എ: ഉസ്ബെക്കിസ്ഥാൻ (H), കിർഗിസ് റിപ്പബ്ലിക്, തുർക്ക്മെനിസ്ഥാൻ, ഒമാൻ.

ഗ്രൂപ്പ് ബി: താജിക്കിസ്ഥാൻ (H), ഇറാൻ, അഫ്ഗാനിസ്ഥാൻ, ഇന്ത്യ.

ഇന്ത്യയുടെ മത്സരക്രമം:

ഓഗസ്റ്റ് 29: താജിക്കിസ്ഥാൻ vs ഇന്ത്യ

സെപ്റ്റംബർ 1: ഇന്ത്യ vs ഇറാൻ

സെപ്റ്റംബർ 4: അഫ്ഗാനിസ്ഥാൻ vs ഇന്ത്യ